Basa ka Ciamis tea - mulang...

Ba’da Maghrib, poe Kemis, 5 April 2007 (jadi malem Juma’ah), acara ngariung dulur jeung tatangga pikeun tahlilan Bi Nunung diayakeun di Masjid Cilulut, teu di imah Nunung da di imah mah loba jalma, dulur-dulur tea.

Breng tahlilan, loba pisan geuning tatangga anu datang, ti Citapen lolobana mah – kaciri marawa lampu senter, poek da di jalanna. Ari sugan teh rek ngan aya 10 atawa 20 urang, ari heg teh mani jul jol teu eureun eureun nepi ka pinuh eta masjid, tangtu dulur mah kabeh oge datang. Biasa, anduk anduk papaku teh dimimitian ku Mang Munir samemeh tahlilan. Rengse tahlilan diteruskeun kana shalat ‘Isya.

Basa tahlilan harita, keur meumeujeuhna maca “Laa ilaaha illallaah”, karasa HP teh ngageter, kusabab dijero calana – hararese lamun dikaluarkeun atuda keur sila, diantep bae heula. Ari rengse tahlil, ditenjo teh, wah ti ozi. Langsung di telepon, seneng kan Ang?. He..he.. Lantaran diuk deukeut Mang Ujang, sakalian we diserahkeun ka tuang ramana ambeh uplek. Ngan hanjakalna, pas ngobrol…pas Mang Cucu adzan, jadi teu kakuping, tungtungna telepon teh usai. Karunya……..

Rengse tahlil, uplek deui ngobrol di imah Nunung. Barudak ABG, anak Ai ceu Een, Anak euis Ceu Een, anak Nunung jeung barudak anu lain campur jeung bebenyit leutik, wah… pokona mah rame, duka iraha deui bisa kumpul kawas kitu. Mani waas jeung reugreug.

Jam 21:00 meureun karek bubar teh, mulang ka desa, ka imah Nini…….

(Lamun mang Aang baca ieu, tah aya hiji deui foto tuang rama waktu atara Asep di rapalan)

---------------

Poe ieu poe Juma’ah, 6 April 2007. Numut kana tanggalan, poe ieu teh beureum anu hartina pere. Cenah mah pere poe paskah, poe sucina umat Kristen, duka naon hartina – pokona mah pere we….
Teu disangka, nikahna Asep kamari 5 April 2007 teh pas pisan jeung ulang tahunna Epi, adina Asep. Atuh mani rame ngucapin salamet jarig (yareh?) ke Epi. Traktir….traktir…traktir ceuk sarerea teh. Belenyeh Ade Epi teh mesem. “Kieu we lah, sok enjing urang ngadamel ikan bakar, enjing kadarieu deui!” ceuk Mang Rahman teh. “Satujuuuuuuuu…” ceuk sarerea.
Tapi…. Eta acara teu jadi dijieun di imah Yayah, jadina teh di imah Nunung di Cilulut. Barabe cenah, da Yayahna ongkoh riweuh nguruskeun bubungkusan keur oleh-oleh anu baralik engke lamun pada bubar, mulang ka lembur masing-masing.

Saba’da Juma’ahan harita teh, Mang Ujang telepon ka imah,

“Araya di bumi?” cenah.

Anu narima teh ua Fe’i.

“Aya” saur ua teh.

“Sok amang bade kadinya, hayang ngobrol” cenah deui.

Teu lila teh, jebul bae anjeuna sumping nyalira. Ngobrol rame-rame, ua Fe’i, Mang Umuh (Malang), Sabar jeung kuring. Ngalor ngidul bae sagala diobrolkeun. Giliran Sabar ngobrol Jepang, anjeuna teh nyaritakeun Ozi.

“Mang, iraha Aang mulang?” ceuk kuring teh

“Tahun payun, 2008” cenah.

“Koq Aad henteu sakalian ngiring kaditu, sakola diditu?”

“Henteu. Kapan eta oge kosi kaditu, kenging 6 sasih, liburan”

“Oh….”

Pas jam kudu ka Cilulut, sarerea kan iwer, hayu…hayu… cenah. Mang Ujang teh nanya, bade ka Cilulut ieu sarera?

“Muhun”.

Atuh Mang ujang uih, punten nya Mang… Karunya, sadidinten teh cenah di bumi bae, mangka lamun aya anu mulang teh mani sok disumpingan da hayang ngobrol. Butuh batur ngobrol tah anjeunanana teh.

Sarerea ngariung di Cilulut bari mawa beuteung kempes, ke ngawaregan mah di Cilulut bae, kan aya ikan bakar. Ikan bakar geus datang kiriman ti Yayah, 2 gurame jeung sababaraha lauk red beli. Cenah mah enak, tapi dahar teh nyokot gurame bae da eta anu apal, lauk liana acan wawuh jadi ragu-ragu.

Ah resep, mani rame. Dariuk teh diluar, sisi balong – malah aya anu di saung di tengah balong. Mani kawas di “little house on the praire” Nikmaaaaat teh…. Hanjakal henteu di foto, poho bakat keu resep. Harita Yayah jeung mang Rahman mah teu milu, nyaeta tadi, keur mungkusan bakal oleh-oleh cenah da Yayah teh mani bungah anu kacida pisan wirehna sarerea dulurna tiasa datang nyaksian Asep dirapalan. Anu wareg mah ngadahar dukuh, aduh eta dukuh mani loba pisan. Duka kunaon kana dukuh teh resep pisan. Ari batur mah resep teh kana kadu, kuring mah kana dukuh! Sok, apal henteu kadu? Duren ceuk urang Jakarta mah.

Bubar ba’da ‘asar, langsung ka imah Nini deui di desa, kapan engke peuting aya tahlil nini sakalian muludan. Ade Heri (anak ua Fe’i) langsung mulang ka Jakarta, aya acara isuk cenah.

Tahlil di imah Nini mani pinuh, biasa baca yasin jeung tahlil. Tapi harita teh poho teu nyiapkeun Yasin, tapi untungna pada hafal tuh kana Yasin, euweuh fisikna surat Yasin oge lancar, anu teu apal kapan bisa nuturkeun anu apal.

Puncakna, ba’da ‘Isya, mimiti tiap “kloter” mulang. Kuring balik ka Jakarta jam 21:30 peuting naik beus, Ceu Euis (Malang) miang ka lembur Mang Umuh ka Dayeuh luhur. Isukna cenah Ua Fe’i jeung Iwan, Yati, abring-abringan ngantay mulang ka Jakarta.

Samemeh bubar, difoto bareng - mumpung ngumpul, tapi kurang hiji........

Mudah-mudahan acara kawas kieu teh bakal aya deui, someday – Insya ALLAH…..
Amin.